دنیا بھر میں سوشل میڈیا پر کم عمر بچوں کی بڑھتی ہوئی موجودگی اور نقصان دہ مواد تک رسائی کے خدشات کے بعد بڑی ٹیکنالوجی کمپنیوں پر دباؤ بڑھ رہا ہے۔ اسی تناظر میں میٹا نے کم عمر صارفین کی شناخت کے لیے جدید آرٹیفیشل انٹیلی جنس (AI) سسٹم متعارف کرانے کا اعلان کر دیا ہے، جس کا مقصد بچوں کو غیر مناسب اور خطرناک مواد سے محفوظ رکھنا ہے۔
میٹا کے مطابق اب فیس بک اور انسٹا گرام پر ایسے اکاؤنٹس کی نگرانی مزید سخت کی جائے گی جن کے بارے میں شبہ ہو کہ وہ 13 سال سے کم عمر بچوں کے ہیں۔ کمپنی نے بتایا ہے کہ نیا اے آئی سسٹم مختلف اشاروں کی مدد سے کسی صارف کی ممکنہ عمر کا اندازہ لگائے گا۔ ان اشاروں میں پروفائل پر درج سالگرہ، اکاؤنٹ کی سرگرمیاں، دوستوں کی معلومات اور دیگر ڈیجیٹل کلیوز شامل ہوں گے۔
میٹا نے واضح کیا ہے کہ یہ کوئی “چہرہ شناخت کرنے والی” ٹیکنالوجی نہیں بلکہ ایسا اے آئی ماڈل ہے جو بصری اشاروں جیسے قد، چہرے کی ساخت اور عمومی ظاہری انداز کو دیکھ کر عمر کا تخمینہ لگاتا ہے۔
کمپنی کے مطابق اگر کسی اکاؤنٹ کے بارے میں شبہ ہوا کہ وہ 13 سال سے کم عمر بچے کا ہے تو اس اکاؤنٹ کو فوری طور پر ڈی ایکٹیویٹ کیا جا سکتا ہے۔ بعد ازاں صارف کو اپنی اصل عمر ثابت کرنے کے لیے دستاویزات یا دیگر ثبوت فراہم کرنا ہوں گے، تب ہی اکاؤنٹ بحال کیا جائے گا۔
میٹا نے صارفین کو بھی اہم اختیار دے دیا ہے۔ اب فیس بک اور انسٹا گرام استعمال کرنے والے افراد کم عمر بچوں کے مشتبہ اکاؤنٹس کو رپورٹ کر سکیں گے، تاکہ کمپنی ایسے اکاؤنٹس کی جانچ کرکے انہیں حذف یا محدود کر سکے۔
کمپنی کا کہنا ہے کہ نوجوانوں اور بچوں کے لیے محفوظ آن لائن ماحول کی فراہمی ان کی ترجیحات میں شامل ہے، اور اسی مقصد کے تحت گزشتہ کئی برسوں سے مختلف حفاظتی فیچرز اور ٹولز تیار کیے جا رہے ہیں۔ میٹا کے مطابق مستقبل میں مزید جدید اے آئی ٹیکنالوجیز بھی متعارف کرائی جائیں گی تاکہ کم عمر صارفین کی بروقت شناخت ممکن بنائی جا سکے۔
یہ نیا سسٹم اب مرحلہ وار دنیا کے مختلف ممالک اور خطوں میں متعارف کرایا جا رہا ہے، جس کے بعد سوشل میڈیا پلیٹ فارمز پر عمر چھپا کر اکاؤنٹ بنانا پہلے جتنا آسان نہیں رہے گا۔