عیدالاضحیٰ کے پرمسرت موقع پر مرکزی جامع مسجد امیرحمزہ کھولیاں درویش آباد میں ایک روح پرور اور ایمان افروز اجتماع کا انعقاد کیا گیا، جہاں نمازِ عید کی امامت و خطابت حضرت مولانا عرفان صاحب نے فرمائی۔ نمازِ عید میں علاقے بھر سے عوام الناس نے بڑی تعداد میں شرکت کی اور اللہ تعالیٰ کے حضور سجدۂ شکر بجا لایا۔
حضرت مولانا عرفان صاحب نے اپنے جامع اور فکر انگیز خطاب میں توبہ کی اہمیت پر روشنی ڈالتے ہوئے کہا کہ انسان جب خلوصِ دل سے اللہ تعالیٰ کی بارگاہ میں رجوع کرتا ہے تو اللہ تعالیٰ اپنے بندوں کی توبہ کو پسند فرماتا اور ان کے گناہوں کو معاف فرما دیتا ہے۔ انہوں نے امتِ محمدیہ ﷺ کے فضائل بیان کرتے ہوئے کہا کہ یہ امت اللہ تعالیٰ کی محبوب ترین امت ہے، جسے خیرِ امت ہونے کا شرف حاصل ہے، لہٰذا ہمیں اپنی زندگیوں کو قرآن و سنت کے مطابق ڈھالنے کی ضرورت ہے۔
خطاب کے دوران انہوں نے قربانی کی فضیلت، اس کی روح اور اہم مسائل پر تفصیلی گفتگو کرتے ہوئے کہا کہ قربانی محض ایک رسم نہیں بلکہ حضرت ابراہیم علیہ السلام اور حضرت اسماعیل علیہ السلام کی عظیم سنت اور اللہ تعالیٰ کے حکم کے سامنے کامل اطاعت و فرمانبرداری کا عملی مظہر ہے۔ انہوں نے حاضرین کو تاکید کی کہ قربانی کے مسائل سیکھ کر شریعت کے مطابق اس عظیم عبادت کو ادا کریں تاکہ اللہ تعالیٰ کی رضا حاصل ہو سکے۔
مولانا عرفان صاحب نے اپنے خطاب کے اختتام پر حاضرین کو نیک اعمال اختیار کرنے، نمازوں کی پابندی کرنے، معاشرتی برائیوں سے بچنے اور آپس میں اتحاد و اخوت کو فروغ دینے کی تلقین کی۔
نمازِ عید کے بعد ملکِ پاکستان کی سلامتی، استحکام، ترقی اور خوشحالی کے لیے خصوصی دعا کی گئی، جبکہ فلسطین اور غزہ کے مظلوم مسلمانوں کے لیے بھی رقت آمیز دعائیں مانگی گئیں۔ شرکاء نے امتِ مسلمہ کے اتحاد، مظلوم مسلمانوں کی مدد اور عالمِ اسلام میں امن و سلامتی کے لیے اللہ تعالیٰ کے حضور خصوصی التجائیں پیش کیں۔