مالاکنڈ (نمائندہ خصوصی): ضلع ملاکنڈ کے علاقے بٹ خیلہ میں ایک دل دہلا دینے والا واقعہ پیش آیا ہے جہاں جمعیت علمائے اسلام (ف) کے ضلعی امیر مفتی کفایت اللہ کے گھر میں فائرنگ سے ان کے اہل خانہ جانی نقصان کا شکار ہوگئے۔ ابتدائی اطلاعات کے مطابق فائرنگ کا واقعہ اس وقت پیش آیا جب مفتی کفایت اللہ کے بیٹے اعتصام نے گھریلو تنازع کے باعث اپنے ہی گھر میں فائرنگ کر دی۔ اچانک کی گئی اس اندھی فائرنگ کے نتیجے میں مفتی کفایت اللہ کا بیٹا عصمت اللہ موقع پر ہی جاں بحق ہوگیا جبکہ ان کی بیٹی بھی گولیوں کی زد میں آکر دم توڑ گئی۔ مفتی کفایت اللہ کی اہلیہ شدید زخمی ہوگئیں اور خود مفتی کفایت اللہ بھی گولی لگنے سے زخمی ہوئے جنہیں فوری طور پر ڈی ایچ کیو اسپتال بٹ خیلہ منتقل کیا گیا۔
اسپتال ذرائع کے مطابق مفتی کفایت اللہ کی حالت تشویشناک تھی، تاہم فوری طبی امداد کے بعد اب ان کی حالت خطرے سے باہر بتائی جا رہی ہے۔ زخمی اہلیہ کو بھی ایمرجنسی وارڈ میں طبی سہولیات فراہم کی جا رہی ہیں۔ اسپتال کے باہر جے یو آئی کارکنان اور اہل علاقہ کی بڑی تعداد جمع ہے جو اس اندوہناک خبر کے بعد صدمے میں مبتلا ہیں۔
لیویز حکام کے مطابق واقعے کے بعد فائرنگ کرنے والا ملزم اعتصام جائے وقوعہ سے فرار ہوگیا ہے۔ علاقے میں سکیورٹی فورسز اور لیویز نے سرچ آپریشن شروع کر دیا ہے اور مختلف مقامات پر ناکے لگا کر ملزم کی گرفتاری کی کوششیں جاری ہیں۔ بٹ خیلہ اور گردونواح میں اس واقعے کے بعد شدید خوف و ہراس کی فضا قائم ہوگئی ہے۔ لوگوں کی بڑی تعداد اسپتال کا رخ کر رہی ہے جبکہ سیاسی و مذہبی رہنماؤں نے واقعے پر گہرے دکھ اور افسوس کا اظہار کیا ہے۔ عوامی حلقوں کا کہنا ہے کہ یہ سانحہ نہ صرف ایک خاندان بلکہ پورے علاقے کے لیے صدمے کا باعث ہے۔
اہل علاقہ اور جے یو آئی کارکنان نے حکومت اور قانون نافذ کرنے والے اداروں سے مطالبہ کیا ہے کہ ملزم کو جلد از جلد گرفتار کر کے انصاف کے کٹہرے میں لایا جائے تاکہ متاثرہ خاندان کو انصاف مل سکے۔
⚠️ نوٹ: یہ خبر ابتدائی معلومات پر مبنی ہے، جیسے ہی مزید حقائق سامنے آئیں گے خبر کو اپڈیٹ کر دیا جائے گا۔